گاؤں کی گڑیا
Thursday, August 10, 2023
بڑی بڑی آنکھوں والی خوبصورت لڑکی، دلہن بنی گڑیا کو دونوں ہاتھوں میں تھامے مبہوت ہو کر دیکھے جا رہی تھی ۔ گاؤں کے لوگ بڑے شوق سے اس منظر کو اپنی آنکھوں پر سجائے مسکرا رہے تھے ۔اس گاؤں میں جو بھی آتا تھا، انہی گڑیاؤں کا ذکر سن کر آتا تھا۔برسوں سے یہ سلسلہ چل رہا تھا۔بڑے بڑے لوگ آتے تھے ،ٹی وی اور فلموں والے بھی آتے تھے اور اس گاؤں کی منظر کشی کرتے تھے ۔پنجاب کے عین وسط میں واقع یہ گاؤں اب دنیا بھر میں گڑیاؤں کے گاؤں کے طور پر مشہور ہو چکا تھا۔آج بھی ایک ٹی وی چینل کی ٹیم اس گاؤں پر ایک دستاویزی فلم کی شوٹنگ کے لیے آئی ہوئی تھی۔ دسمبرکے سرد دن تھے لیکن بڑی اچھی دھوپ نکلی ہوئی تھی اور اس نرم سی ٹھنڈی گرمی میں مشہور ماڈل نیناں گل دلہن بنی پنجابی گڑیا کو دیکھ کر واری واری جا رہی تھی ۔وہ خود کو پنجابی دلہن کے روپ میں دیکھ رہی تھی ۔اس کی ماں پنجابی نہیں تھی لیکن وہ دلہن پنجاب کی بنی تھی اور نیناں گل کے اندر باہر پنجاب بولتا تھا، کبھی لٹھے دی چادر کے سروں میں، کبھی میرا لونگ گواچا اور کبھی بلے بلے کے ناچتے سازوں میں۔نیناں نے پنجابی دلہن گڑیا کو ایسی جپھی ڈال رکھی تھی کہ جیسے آج یہ گڑیا اس کے ساتھ ہی جائے گی ،لیکن ٹیم کے پاس وقت کم تھا، تیزی سے شوٹنگ کی گئی اور نیناں گل پنجاب کی دلہن گڑیا کو اپنی آنکھوںمیں سموئے گاؤں سے رخصت ہو گئی۔
Read more »Labels: Dolls Village
posted by S A J Shirazi @ 4:42 PM,
,
